Eldgamle piler frå Jotunheimen fortel om endringar i fjellet

Brearkeologane i Secrets of the Ice/Innlandet fylkeskommune har denne sesongen samla inn 48 forhistoriske piler frå fjellområdet Kvitingskjølen i Jotunheimen. Funnmaterialet viser ei klar utvikling: stadig fleire gjenstandar som kjem fram, er frå steinalder og bronsealder. Det tyder på at dei eldste delane av isen no er i ferd med å forsvinne.

Etter tre veker med feltarbeid ved Langfonne, Storefonne og Hanklefonne, kan brearkeologane dokumentere at isen trekkjer seg tilbake raskare enn tidlegare rekna med. Område som nyleg var isdekte, ligg no opne, og endringane i landskapet er tydelege.

20 år med brearkeologi

Sidan 2006 har brearkeologane registrert 73 lokalitetar og samla inn over 5 000 gjenstandar. I starten var dei fleste funna yngre enn 2 000 år, ofte frå vikingtid. No er situasjonen annleis: ein aukande del av gjenstandane er eldre, og fleire av årets piler er 5 000–6 000 år gamle. At slike funn kjem fram, heng tett saman med at isen som har vore stabil i tusenvis av år, no er i ferd med å forsvinne.

Sjå funna på norsk fjellsenter

Nokre av dei mest interessante funna frå årets sesong, mellom anna ei steinalderpil med skiferspiss, 5000-6000 år gammal, er mellombels plassert i ferskvaredisken på Norsk fjellsenter. Her blir gjenstandane oppbevarte og viste fram for publikum fram til dei skal vidare til Kulturhistorisk museum seinare i haust. Dette gir publikum ei sjelda moglegheit til å sjå gjenstandane frå fjellet på nært hald – berre dagar etter at dei er funne.

Vidare arbeid

Brearkeologane reknar med at smeltinga vil halde fram, og at fleire av dei kjende lokalitetane kan vere borte innan 20 år. Feltarbeidet held fram så lenge forholda tillet det, med mål om å sikre flest mogleg gjenstandar før vinteren set inn.

Secrets of the Ice
Det brearkeologiske sikringsprogrammet i Innlandet, Secrets of the Ice, er eit samarbeid mellom Innlandet fylkeskommune, Kulturhistorisk museum ved Universitetet i Oslo (KHM), Norsk Fjellmuseum og Klimapark 2469. Etter at funna er samla inn, inngår dei i samlingane til KHM, som forvaltar funna på vegne av fellesskapet. Mange av funna er lånt ut til Norsk Fjellsenter i Lom, der dei inngår i utstillinga “Frose i tid”.

KONTAKT / SPØRSMÅL

Espen Finstad Arkeolog ved Innlandet fylkeskommune Leder av Det brearkeologiske sikringsprogrammet i Innlandet Tlf. +47 901 79 443 espfin@innlandetfylke.no

Julian Robert Post Melbye Arkeolog ved Kulturhistorisk museum, Universitetet i Oslo Funnansvarlig under feltarbeid og etterarbeid Tlf. +47 900 18 570 j.r.post-melbye@khm.uio.no

Thea Grobstok Dalen Kulturminneforvalter / rådgiver / formidler ved Norsk Fjellsenter i Lom Ansvarlig for formidling og utstillinger av brearkeologiske funn ved Norsk Fjellsenter Tlf. +47 906 56 326 thea@norskfjellsenter.no